Saranya Scheme : സാമ്പത്തികമായി പിന്നാക്കം നിൽക്കുന്ന സ്ത്രീകൾക്ക് സ്വന്തം കാലിൽ നിൽക്കാനും വരുമാനം കണ്ടെത്താനും സഹായവുമായി കേരള സർക്കാർ. തൊഴിൽരഹിതരായ പ്രത്യേക വിഭാഗത്തിൽപ്പെട്ട സ്ത്രീകൾക്ക് സ്വയംതൊഴിൽ സംരംഭങ്ങൾ ആരംഭിക്കുന്നതിന് സാമ്പത്തിക സഹായം നൽകുന്ന പദ്ധതിയാണ് ശരണ്യ സ്വയംതൊഴിൽ പദ്ധതി. കേരള തൊഴിൽ വകുപ്പിന്റെ നേതൃത്വത്തിലാണ് പദ്ധതി നടപ്പിലാക്കുന്നത്. വിധവകൾ, വിവാഹമോചിതരായ സ്ത്രീകൾ, ഭർത്താവ് ഉപേക്ഷിച്ച സ്ത്രീകൾ, 30 വയസ്സ് കഴിഞ്ഞ അവിവാഹിതരായ സ്ത്രീകൾ, പട്ടികവർഗ വിഭാഗത്തിലെ അവിവാഹിതരായ അമ്മമാർ, ഭിന്നശേഷിക്കാരായ സ്ത്രീകൾ, കിടപ്പിലായ ഭർത്താക്കന്മാരുടെ ഭാര്യമാർ തുടങ്ങിയവർക്കാണ് പദ്ധതിയുടെ പ്രയോജനം ലഭിക്കുന്നത്.
തൊഴിൽരഹിതരായ സ്ത്രീകളെ സ്വയംപര്യാപ്തരാക്കുകയും കുടുംബത്തിന്റെ സാമ്പത്തിക സ്ഥിതി മെച്ചപ്പെടുത്താൻ സഹായിക്കുകയുമാണ് പദ്ധതിയുടെ പ്രധാന ലക്ഷ്യം. ശരണ്യ പദ്ധതിയിലൂടെ സ്വയംതൊഴിൽ സംരംഭം ആരംഭിക്കുന്നതിന് പരമാവധി 50,000 രൂപ വരെയുള്ള സാമ്പത്തിക സഹായം ലഭ്യമാക്കുന്നു. അനുവദിക്കുന്ന തുകയുടെ 50 ശതമാനം സബ്സിഡിയായും ബാക്കി 50 ശതമാനം പലിശരഹിത വായ്പയായുമാണ് നൽകുന്നത്. അതായത്, 50,000 രൂപയുടെ സഹായം ലഭിക്കുന്നവർക്ക് 25,000 രൂപ സബ്സിഡിയായും 25,000 രൂപ പലിശയില്ലാത്ത വായ്പയായും ലഭിക്കും. തയ്യൽ യൂണിറ്റ്, ചെറിയ കടകൾ, ഭക്ഷ്യ ഉൽപ്പന്ന നിർമാണം തുടങ്ങിയ വരുമാനമുണ്ടാക്കുന്ന സംരംഭങ്ങൾ ആരംഭിക്കാൻ ഈ സഹായം പ്രയോജനപ്പെടുത്താം. പദ്ധതിയുടെ വ്യവസ്ഥകൾക്കും അംഗീകാരത്തിനും വിധേയമായിരിക്കും സാമ്പത്തിക സഹായം.
കേരളത്തിലെ എംപ്ലോയ്മെന്റ് എക്സ്ചേഞ്ചിൽ സജീവ രജിസ്ട്രേഷനുള്ളവർക്കാണ് അപേക്ഷിക്കാൻ കഴിയുക. താൽപര്യമുള്ളവർ സ്വന്തം ജില്ലയിലുള്ള എംപ്ലോയ്മെന്റ് എക്സ്ചേഞ്ചുമായി ബന്ധപ്പെടണം. അപേക്ഷാ ഫോമും ആവശ്യമായ രേഖകളും സംബന്ധിച്ച വിവരങ്ങൾ അവിടെനിന്ന് ലഭിക്കും. സമർപ്പിക്കുന്ന സംരംഭത്തിന്റെ സാധ്യതയും അപേക്ഷകയുടെ സംരംഭം നടത്താനുള്ള കഴിവും പരിശോധിച്ച ശേഷമാണ് സാമ്പത്തിക സഹായം അനുവദിക്കുന്നത്. സ്വന്തമായി ഒരു സംരംഭം ആരംഭിക്കണമെന്ന് ആഗ്രഹിക്കുന്ന സാമ്പത്തികമായി പിന്നാക്കം നിൽക്കുന്ന സ്ത്രീകൾക്ക് ശരണ്യ പദ്ധതി വലിയൊരു അവസരമാണ്. അപേക്ഷാ തീയതികൾ, നിലവിലെ യോഗ്യതാ വ്യവസ്ഥകൾ, ആവശ്യമായ രേഖകൾ എന്നിവ അറിയാൻ അടുത്തുള്ള എംപ്ലോയ്മെന്റ് എക്സ്ചേഞ്ചുമായി ബന്ധപ്പെടുക. Saranya Scheme
Harsha .C. Rajan is a versatile content writer passionate about creating engaging stories. With 2+ years of experience in d website content creation. Harsha specializes in healthcare, entertainment and lifestyle topics. Her writing style is informative, yet conversational, making complex content easy to understand.
