Crispy Uzhunnu Vada : വൈകുന്നേരത്തെ നാലുമണി പലഹാരങ്ങളിൽ മലയാളികൾക്ക് ഏറ്റവും പ്രിയപ്പെട്ട ഒന്നാണ് ഉഴുന്നുവട. പുറത്ത് നല്ല ക്രിസ്പിയും അകത്ത് മൃദുവുമായ ഉഴുന്നുവട ചൂട് ചായയ്ക്കൊപ്പം കഴിക്കുമ്പോൾ ലഭിക്കുന്ന രുചി വേറെയൊന്നിനും ലഭിക്കില്ല. എന്നാൽ വീട്ടിൽ തയ്യാറാക്കുമ്പോൾ പലർക്കും നേരിടുന്ന പ്രധാന പ്രശ്നം വടയ്ക്ക് കടകളിൽ കിട്ടുന്ന പോലെ ക്രിസ്പിനസും സ്വാദും ലഭിക്കാത്തതാണ്. ശരിയായ രീതിയിൽ മാവ് തയ്യാറാക്കി ചെറിയ ചില ടിപ്പുകൾ പാലിച്ചാൽ വളരെ എളുപ്പത്തിൽ കടയിൽ കിട്ടുന്ന അതേ രുചിയിലുള്ള ഉഴുന്നുവട വീട്ടിൽ തന്നെ ഉണ്ടാക്കാം.
ആദ്യം ഒരു കപ്പ് ഉഴുന്ന് നന്നായി കഴുകി വൃത്തിയാക്കിയ ശേഷം മൂന്ന് മണിക്കൂർ നേരം വെള്ളത്തിൽ കുതിർക്കാൻ വയ്ക്കുക. കൂടുതൽ സമയം കുതിർക്കുന്നത് മാവ് വെള്ളമാകാൻ സാധ്യതയുള്ളതിനാൽ മൂന്ന് മണിക്കൂർ മതി. കുതിർന്ന ഉഴുന്ന് വെള്ളം പൂർണമായും കളഞ്ഞ് ഒരു അരിയിലോ ചല്ലനിയിലോ മാറ്റി വയ്ക്കുക. ഉഴുന്നിൽ അധിക വെള്ളം ഉണ്ടെങ്കിൽ വട എണ്ണ കുടിക്കാനും ക്രിസ്പിയാകാതിരിക്കാനും സാധ്യതയുണ്ട്.ശേഷം ഉഴുന്ന് മിക്സിയുടെ ജാറിലേക്ക് ഇട്ട് ഒരു പിടി ഐസ് ക്യൂബും വളരെ കുറച്ച് വെള്ളവും ചേർത്ത് അരച്ചെടുക്കുക. ഐസ് ക്യൂബ് ചേർക്കുന്നത് അരയ്ക്കുമ്പോൾ മാവ് ചൂടാകാതിരിക്കാനും നല്ല വെളുത്ത നിറം ലഭിക്കാനും സഹായിക്കും. മാവ് വളരെ മൃദുവായും കട്ടിയോടുകൂടിയതുമായിരിക്കണം. അരച്ചെടുത്ത മാവിലേക്ക് രണ്ട് ടേബിൾ സ്പൂൺ അരിപ്പൊടി ചേർക്കുക. ഇത് വടയ്ക്ക് കൂടുതൽ ക്രിസ്പിനസ് നൽകും.
ഇനി ഏറ്റവും പ്രധാനപ്പെട്ട ഘട്ടമാണ് മാവ് ബീറ്റ് ചെയ്യുന്നത്. കൈ ഉപയോഗിച്ച് അഞ്ച് മുതൽ പത്ത് മിനിറ്റ് വരെ മാവ് നന്നായി അടിച്ചിളക്കണം. ഇങ്ങനെ ചെയ്യുമ്പോൾ മാവിലേക്ക് വായു കയറുകയും വട കൂടുതൽ മൃദുവും ഫ്ലഫിയുമായി മാറുകയും ചെയ്യും. മാവ് തയ്യാറായോ എന്ന് പരിശോധിക്കാൻ ഒരു ചെറിയ അളവ് മാവ് വെള്ളത്തിൽ ഇട്ട് നോക്കാം. മാവ് വെള്ളത്തിന്റെ മുകളിൽ പൊങ്ങിക്കിടക്കുകയാണെങ്കിൽ അത് ശരിയായ പാകത്തിലാണ്. മാവ് കുറച്ചുനേരം അടച്ച് വച്ചശേഷം അതിലേക്ക് ചെറുതായി അരിഞ്ഞ ഉള്ളി, പച്ചമുളക്, ഇഞ്ചി എന്നിവ ചേർക്കുക. കൂടാതെ അല്പം കുരുമുളക് ചതച്ചതും കായപ്പൊടിയും ആവശ്യത്തിന് ഉപ്പും ചേർത്ത് നന്നായി മിക്സ് ചെയ്യുക. ഇഷ്ടമുള്ളവർക്ക് കറിവേപ്പിലയും ചേർക്കാവുന്നതാണ്. ഇത് വടയ്ക്ക് നല്ല സുഗന്ധവും രുചിയും നൽകും.
ഇനി ഒരു പാനിൽ ആവശ്യത്തിന് എണ്ണ ഒഴിച്ച് നന്നായി ചൂടാക്കുക. എണ്ണ ആവശ്യമായ ചൂടിൽ എത്തിയ ശേഷം വട രൂപപ്പെടുത്താം. ഇടിയപ്പത്തിന്റെ കുഴൽ ഉണ്ടെങ്കിൽ അതിന് മുകളിൽ ഒരു വൃത്തിയുള്ള തുണി വിരിച്ച് അല്പം വെള്ളം നനയ്ക്കുക. ശേഷം മാവ് ചെറിയ ഉരുളകളാക്കി തുണിയിലേക്ക് വച്ച് കൈ കൊണ്ട് പരത്തി നടുവിൽ ഒരു ഓട്ട ഉണ്ടാക്കുക. ശ്രദ്ധാപൂർവ്വം ഇത് ചൂടായ എണ്ണയിലേക്ക് ഇടുക. വടകൾ ഒരു വശം സ്വർണ്ണനിറമാകുമ്പോൾ മറിച്ചിട്ട് മറുവശവും ഒരുപോലെ വേവിക്കുക. തീ വളരെ കൂടുതലാകരുത്; മിതമായ തീയിൽ വറുത്താൽ മാത്രമേ അകത്തും പുറത്തും ഒരുപോലെ വേവുകയുള്ളു. നല്ല ഗോൾഡൻ ബ്രൗൺ നിറമാകുമ്പോൾ എണ്ണയിൽ നിന്ന് കോരി ടിഷ്യു പേപ്പറിൽ വയ്ക്കുക. ഇങ്ങനെ തയ്യാറാക്കുന്ന ഉഴുന്നുവടയ്ക്ക് പുറത്ത് നല്ല ക്രിസ്പിയും അകത്ത് മൃദുത്വവും ലഭിക്കും. ചൂട് ചായ, തേങ്ങാ ചമ്മന്തി, സാമ്പാർ എന്നിവയ്ക്കൊപ്പം വിളമ്പിയാൽ അതിന്റെ രുചി ഇരട്ടിയാകും. വീട്ടിലുള്ള സാധാരണ ചേരുവകൾ മാത്രം ഉപയോഗിച്ച് എളുപ്പത്തിൽ തയ്യാറാക്കാവുന്ന ഈ റെസിപ്പി ഒരിക്കൽ പരീക്ഷിച്ചാൽ വീണ്ടും വീണ്ടും ഉണ്ടാക്കാൻ തോന്നുന്ന വിധം രുചികരമായിരിക്കും. കുടുംബാംഗങ്ങൾക്കും അതിഥികൾക്കും ഒരുപോലെ ഇഷ്ടപ്പെടുന്ന ഈ ക്രിസ്പി ഉഴുന്നുവട റെസിപ്പി തീർച്ചയായും പരീക്ഷിച്ചു നോക്കൂ.
Harsha .C. Rajan is a versatile content writer passionate about creating engaging stories. With 2+ years of experience in d website content creation. Harsha specializes in healthcare, entertainment and lifestyle topics. Her writing style is informative, yet conversational, making complex content easy to understand.
